Għal sena oħra l-Għaqda tal-Malti – Università se tieħu sehem fil-Festival tal-Ktieb fuq il-Kampus u se ttella' tliet attivitajiet. L-ewwel waħda hija Poeżija Slam, attività li tgħaqqad il-poeżija mal-arti performattiva. Il-parteċipanti huma mħeġġa jagħżlu poeżija oriġinali u jagħtuha bixra performattiva b'leħinhom u ġisimhom. Dawk li jixtiequ jieħdu sehem għandhom jirreġistraw. F'attività oħra l-Prof. Michael Spagnol mid-Dipartiment tal-Malti se jagħti taħdita dwar is-self tal-Malti mill-Ingliż u jistieden lill-udjenza tirrifletti fuq x'inhu Malti u x'mhuwiex. Fl-aħħar ġurnata tal-Festival Abigail Mallia u Carlos Debattista (Take//Two) se jmexxu diskussjoni interattiva dwar il-lingwa taċ-ċinema u t-televixin. 

Agħfas fuq l-istampa għall-programm sħiħ tal-attivitajiet.

Id-Dipartiment tal-Malti jifraħ lil Kelly Saliba, Raffaello Bezzina, u Shanna Zammit Cordina li kisbu Masters fil-Malti mill-Università ta' Malta. Kelly Saliba ħadmet fuq Il-Kwalitajiet Emerġenti fin-Novella Maltija tal-Bidu tas-Seklu 21; Raffaello Bezzina ħadem fuq Il-Formazzjoni tal-Kelma fil-Malti: Restrizzjonijiet f'Numru ta' Suffissi Derivattivi Magħżula; u Shanna Spiteri (issa Zammit Cordina) studjat L-Ispazji tal-Poter f'Ħelsien ta' Ġużè Bonnici.

Ħajr lil Dr Immanuel Mifsud, lill-Prof. Michael Spagnol, u lill-Prof. Adrian Grima li mexxew dawn it-tliet teżijiet.  

Is-Sibt 13 ta' April se tittella' l-attività Ħarstek Vjola Tkanta, serata mużiko-letterarja f'ġieħ Oliver Friggieri. Matulha se jindaqqu għall-ewwel darba disa' poeżiji ta' Oliver Friggieri li ġew immużikati minn Tano Monseigneur. Se jinqraw ukoll xogħlijiet ġodda ta' kittieba emerġenti ispirati mill-istess poeżiji ta' Friggieri jew li jiddjalogaw magħhom.

Din l-attività qed tittella' mill-Fondazzjoni tal-Ġiżwiti f'kollaborazzjoni mad-Dipartiment tal-Malti u l-Għaqda tal-Malti – Università, u hija parti mis-sensiela Music & More at the Jesuits. Tibda fis-7:30pm u se ssir fl-oratorju tal-Knisja tal-Ġiżwiti, il-Belt. 

Agħfas fuq ir-ritratt għal tagħrif ieħor.