Mejju 2024 Araha online
Malti Is-sit tar-riċerka tad-Dipartiment tal-Malti
Erba' studenti tal-Malti fil-Lista tad-Dekan

Id-Dipartiment tal-Malti jifraħ lil erba' studenti tat-tielet sena tal-Baċellerat, Daniel Attard (Malti u Filosofija), Amy Borg (Malti u Ingliż), Maxine Tanti (Malti u Ġermaniż), u Nicole Vassallo (Ġermaniż u Malti), li daħlu fil-Lista tad-Dekan. Dan ir-rikonoxximent jingħata lill-istudenti li jiksbu l-aħjar riżultati fl-ewwel sentejn tal-kors tagħhom. Din is-sena ngħata b'kollox lil għaxar studenti minn dipartimenti differenti tal-Fakultà tal-Arti. Għaċ-ċerimonja li saret f'April fil-Librerija tal-Fakultà, kienu preżenti d-Dekan, il-Prof. Dominic Fenech, u l-Kap tad-Dipartiment tal-Malti, il-Prof. Adrian Grima.  

Agħfas fuq ir-ritratt biex taqra dwar iċ-ċerimonja.
Il-15-il edizzjoni tal-konferenza tal-AIDA
Mill-21 sal-24 ta' Mejju, id-Dipartiment tal-Malti, id-Dipartiment tal-Lingwi u l-Kulturi tal-Lvant Nofsani u l-Asja, u l-Istitut tal-Lingwistika u t-Teknoloġija tal-Lingwi organizzaw il-ħmistax-il edizzjoni tal-konferenza tal-AIDA, l-Assoċjazzjoni Internazzjonali tad-Djaletti tal-Għarbi, li twaqqfet f'Pariġi fl-1992 bl-għan li tippromwovi d-djaletti Għarab u r-riċerka dwarhom. Kull sentejn issir konferenza, u din is-sena saret l-Università ta' Malta, fil-binja tal-Belt Valletta, bis-sehem ta' aktar minn 170 ruħ, bejn studjużi, studenti u riċerkaturi minn madwar id-dinja. Il-konferenza, li kien fiha 83 preżentazzjoni orali u 11-il poster akkademiku, ittellgħet bil-ħidma tal-Prof. Michael Spagnol, il-Prof. Ray Fabri, Dr Kurstin Gatt, Raffaello Bezzina u Michela Vella. Id-Dipartiment tal-Malti jixtieq jirringrazzja lil numru ta' studenti li taw sehemhom fl-organizzazzjoni tal-konferenza. 

Agħfas fuq ir-ritratt biex tara oħrajn.
Kumitat ġdid għall-Għaqda tal-Malti

Dan l-aħħar il-ħidma tal-Għaqda tal-Malti – Università (GħMU) ġiet rikonoxxuta b'żewġ premjijiet: il-Premju għall-Organizzazzjoni Studenteska tas-Sena mogħti mill-FreeHour u l-Premju Kokka Organizzazzjoni mogħti fil-Kokka Night 2024 organizzat mill-Kunsill Studenti Universitarji (KSU).

Il-Ħadd 28 ta' April saret il-Laqgħa Ġenerali Annwali tal-Għaqda u ngħatat ħarsa lejn ix-xogħol li sar matul it-terminu li għadda. Inħatar ukoll il-kumitat il-ġdid għat-terminu 2024-2025. Ilona Sciberras inħatret President, Bradley Cachia Viċi President, Jade Briffa Segretarja, Nicole Bartolo Teżoriera, u Klara Vassallo Uffiċjal għar-Relazzjonijiet Pubbliċi.

Id-Dipartiment tal-Malti jawgura lill-GħMU aktar enerġija u dedikazzjoni b'risq il-lingwa u l-kultura Maltija. 


Agħfas fuq ir-ritatt tal-kumitat il-ġdid biex tara ritratti oħra li ttieħdu waqt il-LĠA.
Żewġ korsijiet online fis-sajf

Tisħiħ fil-Kitba tal-Malti 1 (DGP0453) u Ritmi Mqallba (DGP0456) huma żewġ korsijiet tad-Degree+ li tista' ssegwi dan is-sajf. Iż-żewġ korsijiet jikkonsistu fi 8 sessjonijiet online f'Lulju u Awwissu. L-ewwel kors hu maħsub għal dawk li jixtiequ jtejbu l-kitba tal-Malti, u l-lezzjonijiet se jsiru l-Erbgħa mill-4 PM sas-6 PM. It-tieni wieħed huwa kors prattiku u intensiv fil-kitba tal-poeżija, u l-lezzjonijiet se jsiru t-Tlieta mis-2 PM sal-4 PM.

Biex tapplika ibgħat il-kodiċi tal-kors (DGP0453 / DGP0456) u
n-numru tal-karta tal-identità tiegħek lil degreeplus@um.edu.mt

L-applikazzjonijiet jagħlqu l-Ġimgħa 28 ta' Ġunju jew qabel jekk jimtlew il-postijiet. 

Id-Dipartiment tal-Malti, Il-Fakultà tal-Arti, L-Università ta’ Malta, L-Imsida MSD 2080, Malta
Ibdel is-sħubija    |    Araha online

Jekk ma tixtieqx tisma' aktar b'aħbarna, waqqaf is-sħubija