It-tielet konferenza annwali mis-sensiela Appuntamenti mar-Riċerka saret is-Sibt 1 ta' Ġunju, l-Università l-Qadima. Sitt riċerkaturi tal-Masters u d-Dottorat ippreżentaw l-istudju tagħhom fuq il-lingwa u l-letteratura Maltija. Fl-ewwel parti tal-konferenza Jean Paul Borg għamel intervent bl-isem "Bejn xiħ u pops: il-mit tal-figura tal-missier;" John Paul Grima tkellem dwar it-teżi tiegħu "Lejn Ġabra ta' Riżorsi Terminoloġiċi bil-Malti" li għadu kemm temm; u Fiona Camilleri tat preżentazzjoni fuq "Ir-rappreżentazzjoni tal-karattru Malti f'rumanzi ta' xeħta soċjali mis-sittinijiet sat-tmeninijiet." Fit-tieni parti Michela Vella tkellmet dwar "Il-kisba tal-Malti bħala l-ewwel lingwa: analiżi morfosintattika;" Matthew Chappell tkellem fuq "Is-Seħer tar-Re" b'rabta mar-riċerka tiegħu fuq il-politiċizzazzjoni tal-mewt fil-letteratura kontemporanja Maltija; u Dwayne Ellul għamel preżentazzjoni fuq "Il-lessikografija Maltija: ħarsa storika u l-qagħda attwali." 

Din il-konferenza għalqet is-sensiela ta' seminars ta' riċerka li d-Dipartiment tal-Malti jorganizza matul is-sena akkademika. Dawn is-seminars joffru spazju biex l-istudenti postgradwatorji jiddiskutu r-riċerka tagħhom. 

Agħfas fuq ir-ritratt ta' Matthew Chappell biex tara iktar ritratti tal-attività.

Taħt il-qoxra tad-dizzjunarju hija sensiela ta' intervisti li saret mill-istudenti tat-taqsima-studju 'Il-Lessikografija Maltija' matul din is-sena akkademika u ta' qabilha. L-istudenti rriċerkaw għadd ta' dizzjunarji u intervistaw lessikografi, studjużi u pubblikaturi dwarhom. Fost l-oħrajn, Shanaya Farrugia u Rebecca Greengrass intervistaw lill-Prof. Arnold Cassola dwar ir-Regole per la Lingua Maltese, u Jesmiel Raines u Maria Christina Mallia intervistaw lil Dr Olvin Vella dwar il-Lexicon ta' Mikiel Anton Vassalli.

Dawn l-intervisti ġew ikkordinati mil-lettur tat-taqsima, is-Sur Dwayne Ellul, u l-filmati nġibdu u ġew editjati mis-Sur Daniel Bezzina. 

Agħfas fuq ir-ritatt biex tara lil Francesca Xuereb tintervista lis-Sur Dwayne Ellul dwar id-dizzjunarju ta' Dun Karm.

Fil-bidu ta' Ġunju wħud mil-letturi tad-Dipartiment tal-Malti laqgħu l-istedina ta' Dr Joan Abela, lettriċi fid-Dipartiment tal-Istorja u l-President tal-Fondazzjoni tal-Arkivji Notarili, u żaru l-Arkivji tan-Nutara, il-Belt Valletta. Minbarra l-Kantilena, l-eqdem kitba bil-Malti, raw għadd ta' dokumenti oħra; iltaqgħu ma' bosta professjonisti u voluntiera; u semgħu dwar il-konservazzjoni tal-parċmina u l-karta, l-arti u s-sengħa tal-legatura, u d-diġitalizzazzjoni tar-reġistri u d-dokumenti. Dr Olvin Vella, membru tad-Dipartiment, ilu s-snin jikkollabora ma' Dr Abela u mal-Arkivji Notarili. Id-Dipartiment tal-Malti ħerqan biex isaħħaħ din il-kollaborazzjoni permezz ta' inizjattivi u proġetti bi sħab. 

Agħfas fuq ir-ritratt biex tara oħrajn. 

Jekk ma tixtieqx tisma' aktar b'aħbarna, waqqaf is-sħubija