Fl-14 ta' Frar sar is-Seminar tat-Teżini, appuntament annwali tad-Dipartiment tal-Malti bis-sehem tal-letturi u l-istudenti tal-Baċellerat. F'dan is-seminar, ikkordinat mill-Prof. Immanuel Mifsud, Daniel Attard irċieva l-Premju Ġużè Aquilina għat-teżina tal-BA "Il-Ġrajja tal-Laqgħa tal-Kittieba tal-Malti (1920): Sfidi u Soluzzjonijiet" u Klara Vassallo ngħatat il-Premju Oliver Friggieri għat-teżina tagħha "Silenzji li nduqu u metafori sinestetiċi oħra f'Nadia Mifsud." Dawn iż-żewġ gradwati u tnejn oħra, Cherise Aquilina u Maria Bellia, għamlu preżentazzjoni dwar it-teżini tagħhom li ntlaqgħu tajjeb ħafna mill-bord tal-eżaminaturi.

Tqassmet ukoll il-ħames ħarġa ta' Riċerkaturi, ir-rivista akkademika tad-Dipartiment tal-Malti, editjata mill-Prof. Michael Spagnol.

Agħfas fuq ir-ritratt biex tara oħrajn.

It-tieni workshop dwar ir-riżorsi diġitali għall-Malti tellajnieh fil-11 ta' Frar b'kollaborazzjoni mal-Istitut tal-Lingwistika u t-Teknoloġija tal-Lingwa, id-Dipartiment tal-Intelliġenza Artifiċjali, il-Kunsill Nazzjonali tal-Ilsien Malti, u l-Malta Centre. Diversi parteċipanti tkellmu dwar l-għodod li qed jiżviluppaw biex il-Malti jkompli jinfirex fl-oqsma tat-teknoloġija diġitali u l-intelliġenza artifiċjali. Saru preżentazzjonijiet fuq l-iżvilupp ta' mudelli lingwistiċi kbar (LLM) u korpora differenti, proġetti fuq it-traduzzjoni awtomatika, glossarji terminoloġiċi, mudelli speech-to-text, u oħrajn.

Ritratt ta' James Moffett.

Fil-bidu ta' Frar sar seminar ta' riċerka ieħor għal-letturi tad-Dipartiment tal-Malti fil-Park Naturali ta' Xrobb l-Għaġin. Il-Prof. Manwel Mifsud tkellem fuq il-proġett tal-ġbir tal-kwartini tal-għana tradizzjonali li ilu għaddej bih ħafna snin. Dr Olvin Vella ddiskuta l-proġett ta' riċerka li qed imexxi ma' għadd ta' studenti u gradwati tal-Malti fuq id-dokumentazzjoni datata tal-kliem. Wara s-seminar il-kollegi kellhom l-opportunità jaraw u jisimgħu fuq il-konservazzjoni u riabilitazzjoni tal-fkieren u l-qniefed mill-bijoloġisti u l-voluntiera ta' Nature Trust Malta. 

Agħfas fuq ir-ritratt biex tara oħrajn.

Jekk ma tixtieqx tisma' aktar b'aħbarna, waqqaf is-sħubija