Id-Dipartiment tal-Malti jifraħ lil John Paul Grima u lil Lara Stagno li kisbu Masters fil-Malti mill-Università ta' Malta. John Paul ħadem fuq It-terminoloġija Maltija: Lejn ġabra ta' riżorsi terminoloġiċi bil-Malti u Lara studjat L-illokuzzjoni u l-perlokuzzjoni fil-poeżija ta' Nadia Mifsud.

Ħajr lill-Prof. Michael Spagnol u lill-Prof. Bernard Micallef li mexxewhom fit-teżijiet tagħhom.

Il-pubblikazzjoni In-Niggieża tan-Narrattiva: Il-Proża Politika tiġbor l-atti tal-konferenza ta' Lingua-Politik 3 li d-Dipartiment tal-Malti u d-Dipartiment tal-Istudji Politiċi u l-Governanza organizzaw f'April 2024. Tikkonsisti f'ħames studji ewlenin li jiddiskutu temi u ideat politiċi f'rabta mal-letteratura u s-soċjetà: Dr Kurt Borg jistħarreġ il-politika tal-ġeneru fir-rumanz Marta Marta ta' Loranne Vella; Dr Luke J. Buhagiar jiddiskuti xi perspettivi ta' Emil Cioran u l-ġeneru tal-mikrofinzjoni b'referenzi għal Tbajja' tax-Xemx ta' Rita Saliba; il-Prof. Immanuel Mifsud janalizza l-fili politiċi tan-novella mhux ippubblikata 'Il-Baruni tar-Rabat tal-Imdina' ta' Mary Meylak; is-Sur Romario Sciberras jiddiskuti ċ-ċittadinanza Queer f'L-Aqwa Żmien ta' Immanuel Mifsud; u s-Sa Justine Somerville tesplora l-memorja u l-istorja fir-rumanz Castillo ta' Clare Azzopardi.

L-edituri huma Dr Kurt Borg, il-Prof. Adrian Grima, u l-Prof. Mario Thomas Vassallo. Dawk li jixtiequ kopja b'xejn jistgħu jikkuntattjaw lid-Dipartiment tal-Malti.

L-Inalco (Institut National des Langues et Civilations Orientales) hija università ewlenija tat-tagħlim tal-lingwi fi Franza u fiha jiġu mgħallma iżjed minn mitt lingwa, fosthom il-Malti. Il-kollaborazzjoni bejn membri akkademiċi tad-Dipartiment tal-Malti u tal-Inalco ilha għaddejja s-snin. Kollegi mill-Inalco, fosthom il-Prof. Mourad Yelles u l-Prof. Christophe Pereira, kienu taw taħditiet fid-Dipartiment tal-Malti. Fost dawk li fl-imgħoddi għallmu l-Malti l-INALCO hemm il-Prof. Albert Borg u l-Prof. Martine Vanhove. Il-Prof. Adrian Grima ilu għal dawn l-aħħar ħdax-il sena jgħallem kors fil-Malti lill-istudenti tat-tielet sena tal-Baċellerat li jispeċjalizzaw fil-lingwi Għarab tal-Magreb. Din is-sena kellu grupp ta' sitt studenti u lkoll kienu ħerqanin biex jifhmu kif żviluppa u jaħdem ilsienna. 

Jekk ma tixtieqx tisma' aktar b'aħbarna, waqqaf is-sħubija