Isma' b'Aħbarna | Novembru 2025

Novembru 2025

Araha online

Is-sit tar-riċerka tad-Dipartiment tal-Malti

Jiggradwaw l-istudenti tal-Malti

Iċ-ċerimonja tal-gradwazzjoni tal-Baċellerat fl-Arti saret fit-18 ta' Novembru fis-Sala Sir Temi Zammit. Bejn Ġenerali u Unuri, din is-sena ggradwaw 16-il student u studenta fil-Malti. Fosthom kien hemm Bradley Cachia li għamel id-diskors f'isem il-gradwati kollha. Uħud mil-letturi tal-Malti tkellmu mal-istudenti wara ċ-ċerimonja u ħadu gost jisimgħu fuq it-toroq differenti li qabdu. Id-Dipartiment tal-Malti kburi bihom u jawguralhom kull suċċess fil-vjaġġ il-ġdid tagħhom.

Ħajr lil EBC Visuals għar-ritratt. Agħfas fuqu biex tara l-filmat taċ-ċerimonja: jibda 21:25.

Il-maskulinità lil hinn mill-isterjotip

Fid-19 ta' Novembru ttellgħet it-tieni edizzjoni ta' Raġel fuq l-Irġiel mill-Uffiċċju tal-Ekwità u l-Prof. Carmen Sammut, Prorettur għall-Istudenti u l-Impjegati u l-Kuntatt mal-Komunità. L-interventi ta' kelliema minn oqsma differenti ttrattaw ir-relazzjoni kumplessa bejn il-maskulinità u s-saħħa mentali bl-għan li jinħoloq spazju għal diskussjoni miftuħa u riflessjoni kritika. Il-programm inkluda konverżazzjoni rrekordjata dwar il-figura tal-missier fil-letteratura u t-teatru kontemporanju. Dr Omar N'Shea u s-Sur Roderick Vassallo tkellmu ma' Jean Paul Borg u Alessia Emily Bonavia li t-tnejn għamlu teżi fuq is-suġġett mad-Dipartiment tal-Malti u tmexxew mill-Prof. Immanuel Mifsud. Borg tkellem fuq ir-riċerka tal-MA, Minn XIħ għal Pops: Ir-rappreżentazzjoni tal-missier mid-disgħinijiet 'il hawn, u Bonavia tkellmet fuq it-teżi tal-BA, Il-Figura tal-Missier fit-Teatru Kontemporanju Malti.

Agħfas fuq il-poster biex tara l-filmat tal-attività. L-intervent bis-sehem ta' Borg u Bonavia jibda 1:40:00.

Pittura tal-Prof. Oliver Friggieri

F'għeluq il-ħames snin minn meta ħalliena l-Prof. Oliver Friggieri, l-Għaqda tal-Malti – Università, id-Dipartiment tal-Malti u l-Akkademja tal-Malti ngħaqdu biex ifakkru x-xogħol u l-ħajja tiegħu b'pittura tal-artist Darren Tanti.

L-inawgurazzjoni saret fis-Sala Oliver Friggieri, fil-Melitensia tal-Università, fil-21 ta' Novembru. Saru diskorsi qosra minn Kevin J. Ellul, il-Bibljotekarju tal-Università; Beverly Agius, riċerkatriċi u assistenta librara; l-artist Darren Tanti; u Sara Brincat Friggieri, bint Oliver Friggieri. Nicole Bartolo mexxiet is-serata, Rita Saliba u Elena Vella qraw żewġ poeżiji ta' Friggieri, u l-vjolinista Doriana Vella daqqet xi siltiet Klassiċi.

Agħfas fuq ir-ritratt li ħa Gabriel Borg biex tara oħrajn mill-paġna tal-Għaqda tal-Malti – Università.

Taħditiet tal-Għaqda tal-Għalliema tal-Malti

Minn żmien għal żmien l-Għaqda tal-Għalliema tal-Malti torganizza taħditiet online li matulhom jiġu diskussi temi bħall-ortografija, l-analiżi letterarja u punti grammatikali fil-kuntest tat-tagħlim tal-Malti. Dawn jiġu rrekordjati u jittellgħu online fl-istazzjon tal-YouTube tal-Għaqda u ta' malti.mt, il-portal tad-Dipartiment tal-Malti. Fost it-taħditiet li ttellgħu s'issa hemm waħda mill-Prof. Michael Spagnol fuq is-sinonimi fil-Malti; oħra fuq it-tagħlim għal tfal neqsin mis-smigħ mill-Prof. Marie Alexander; u tnejn dwar l-analiżi ta' test mhux imħejji, waħda mill-Prof. Adrian Grima fuq il-poeżija u oħra mis-Sur Kit Azzopardi fuq il-proża.

Agħfas fuq l-istampa għall-playlist tal-filmati kollha li ttellgħu s'issa.

Id-Dipartiment tal-Malti, Il-Fakultà tal-Arti, L-Università ta’ Malta, L-Imsida MSD 2080, Malta

Ibdel is-sħubija | Araha online

Jekk ma tixtieqx tisma' aktar b'aħbarna, waqqaf is-sħubija