Din is-sena qed infakkru l-mitejn anniversarju mindu Mikiel Anton Vassalli fetaħ l-ewwel skola tal-Malti fil-bini storiku tal-Università fil-Belt, fl-1825. Għalhekk it-Tlieta 16 ta' Diċembru tellajna serata kommemorattiva mal-Akkademja tal-Malti. Il-kelliema kienu s-Sur David Agius Muscat, li għadu kemm temm id-dottorat fuq il-Malti fl-ewwel nofs tas-seklu dsatax u wasal biex jippubblika ktejjeb b'tagħrif ġdid dwar il-bidu tal-kors tal-Malti fl-Università; il-Prof. Frans Ciappara, storiku ewlieni u awtur tal-bijografija Mikiel Anton Vassalli (1764-1829): An Enlightened Maltese Reformer (2014); Dr Sergio Grech, il-President tal-Akkademja tal-Malti, li dan l-aħħar ħadem fuq l-istorja tad-Dipartiment tal-Malti; u Dr Olvin Vella, li kiteb u editja għadd ta' xogħlijiet fuq Vassalli.

Is-serata bdiet b'diskors mir-Rettur, il-Prof. Alfred J. Vella, u ntemmet b'diskors mill-Kap tad-Dipartiment tal-Malti, il-Prof. Adrian Grima. Fi tmiem il-kommemorazzjoni, Dr Olvin Vella ppreżenta lir-Rettur għadd ta' pubblikazzjonijiet marbutin ma' Vassalli li ġew ippubblikati bis-sehem tad-Dipartiment tal-Malti.

Ritratt ta' Elisa von Brockdorff. Agħfas fuqu biex tara oħrajn u taqra iktar fuq is-serata. 

L-istudenti tal-Malti tat-tieni sena attendew taħdita tal-Prof. Ibtissem Chachou dwar is-sitwazzjoni soċjolingwistika fl-Alġerija u dwar ir-riferimenti għal Malta fil-letteratura popolari u l-kultura orali Alġerina. Il-Prof. Adrian Grima introduċa lill-kelliema u flimkien mal-Prof. George Farrugia mexxa d-diskussjoni li saret wara t-taħdita.  

Il-Prof. Ibtissem Chachou, mill-Università ta' Mostaganem fl-Alġerija, hija l-awtriċi ta' kotba akkademiċi bħal La Situation Sociolinguistique de l'Algérie: Pratiques plurilingues et variétés à l'oeuvre (2013) u Introduction à l'histoire des langues en Algérie (2023). 

Agħfas fuq ir-ritratt biex tara oħrajn u taqra r-riflessjonijiet tal-Prof. Adrian Grima dwar it-taħdita u s-sitwazzjoni lingwistika kumplessa fl-Alġerija. 

Il-konferenza "Togħma u Traduzzjoni" ħadet spunt mir-reġistrazzjoni tal-ġbejna tan-nagħaġ fl-2025 bħala DOP (Denominazzjoni ta' Oriġini Protetta) u fiha ġiet diskussa r-relazzjoni bejn it-traduzzjoni u l-ikel u x-xorb. Wieħed mill-kelliema kien is-Sur John Paul Grima li ħares lejn ir-riżorsi terminoloġiċi bil-Malti marbuta mal-ikel u t-tisjir. Kelliem ieħor mill-qasam tal-Malti kien il-Prof. Adrian Grima li ffoka fuq il-funzjoni tal-ikel u l-ikliet fir-rumanz ta' Concetta Brincat, Il-Familja de Valereux jew Louis Mitluf Ġewwa l-Bosk (1919). Il-konferenza tmexxiet mis-Sur David Schembri mir-Rappreżentanza tal-Kummissjoni Ewropea f'Malta. Il-kelliema l-oħra kienu s-Sur Daniel Borg, Dr Noel Buttigieg, is-Sa Angela Debono, Dr Anthony Gruppetta, is-Sa Karmen Tedesco, u l-Prof. Clare Vassallo.

Din il-konferenza kienet parti mill-programm ta' Translating Europe Workshops, imtellgħin mid-Direttorat Ġenerali għat-Traduzzjoni tal-Kummissjoni Ewropea, bi sħab mad-Dipartiment tal-Malti u d-Dipartiment tat-Traduzzjoni, it-Terminoloġija u l-Interpretar fl-Università ta' Malta. 

Agħfas fuq ir-ritratt ta' Elisa von Brockdorff biex tara oħrajn.

Jekk ma tixtieqx tisma' aktar b'aħbarna, waqqaf is-sħubija