Is-Sibt 2 ta' Novembru ġiet organizzata attività li matulha tnieda s-sit il-ġdid tal-Malta Centre (Bremen-Malta), maltacentre.eu. Wara l-introduzzjoni tal-Prof. Michael Spagnol, iż-żewġ amministraturi tal-fergħa lokali taċ-Ċentru, Raffaello Bezzina u Michela Vella, tkellmu fuq it-taqsimiet tas-sit, fosthom il-biblijografija ta' xogħlijiet lingwistiċi fil-Malti. Ittella' wkoll workshop tal-glossing għall-Malti u l-Prof. Ray Fabri għamel preżentazzjoni fuq xi problemi marbutin mal-prattika tal-glossing għall-Malti. Warajh il-Prof. Thomas Stolz tkellem fuq kif il-glossing jiffaċilita l-komunikazzjoni internazzjonali dwar il-lingwistika. Il-parteċipanti kellhom l-opportunità jipprattikaw il-glossing ta' xi kliem u frażijiet bil-Malti u jiddiskutu bejniethom l-intoppi u s-soluzzjonijiet.  

Il-Malta Centre huwa proġett tad-Dipartiment tal-Lingwistika u l-Letteratura fl-Università ta' Bremen u d-Dipartiment tal-Malti u l-Istitut tal-Lingwistika u t-Teknoloġija tal-Lingwa fl-Università ta' Malta. L-għan taċ-Ċentru hu li jrawwem interess kontinwu fil-lingwistika Maltija fl-universitajiet u lil hinn.

Agħfas fuq ir-ritratt għal tagħrif ieħor fuq il-prattika tal-glossing u l-attività tat-2 ta' Novembru.

F'Novembru lqajna fostna lill-Prof. Yousef Abu Amrieh mid-Dipartiment tal-Ingliż fl-Università tal-Ġordan. Matul iż-żjara tiegħu għamel tliet taħditiet: l-ewwel waħda fuq il-karattru fittizju tat-traduttur fir-rumanzi ta' kittieba Għarab tad-dijaspora; it-tieni waħda fuq ix-xbihat tat-tjur fir-rumanz L-Eżodu taċ-Ċikonji ta' Walid Nabhan; u t-tielet waħda fuq l-adattament tan-novella "Dar ir-Rummien" ta' Pierre J. Mejlak għall-film qasir ta' Federico Chini u Manuel Xuereb. Għal dawn it-taħditiet attendew studenti minn livelli u dipartimenti differenti, fosthom tal-Malti, tal-Lingwi u l-Kulturi tal-Lvant Nofsani u l-Asja, u tat-Traduzzjoni, it-Terminoloġija u l-Interpretar. Kemm dam magħna l-Prof. Abu Amrieh iltaqa' wkoll ma' żewġ studenti postgradwatorji tal-letteratura Maltija li kellmuh fuq ir-riċerka tagħhom u ddiskutew miegħu l-analiżi tan-narrattiva ta' Walid Nabhan.

Agħfas fuq ir-ritratt għal iktar tagħrif.

Fl-20 ta' Novembru ttellgħet sessjoni mill-Uffiċċju tal-Ekwità u l-Kumitat tal-Ugwaljanza Soċjali u d-Diversità Sesswali tal-Università. L-interventi ta' kelliema differenti ttrattaw il-maskulinità f'oqsma bħal-logħob diġitali, l-edukazzjoni, ir-reliġjon u l-fidi. Il-Prof. Immanuel Mifsud tkellem dwar l-irġulija fil-letteratura Maltija u l-attur u student tad-Dipartiment tal-Malti Bradley Cachia għamel intervent bit-titlu "Il-Qawl Iqul għar-Raġel Cool." Il-preżentazzjoni ta' Bradley, riċerkata u miktuba minnu stess, kienet tikkonsisti f'kumment satiriku ispirat minn qwiel Maltin li jittrattaw il-maskulinità eġemonika u d-differenza bejn is-sessi.  

Agħfas fuq ir-ritratt biex tara l-filmat bl-interventi kollha.

Jekk ma tixtieqx tisma' aktar b'aħbarna, waqqaf is-sħubija