Dan l-aħħar ikkwalifikaw 38 persuna oħra biċ-Ċertifikat Universitarju fil-Qari tal-Provi bil-Malti. Fost il-qarrejja tal-provi l-ġodda hemm edukaturi, xandara, uffiċjali tal-komunikazzjoni f'entitajiet tal-gvern, tradutturi mill-istituzzjonijiet Ewropej, uffiċjali tal-kunsilli lokali, u ħaddiema oħra mis-settur privat. Minn meta fetaħ fl-2006, b'kollox dan il-kors temmewh b'suċċess 730 ruħ.

Dan il-kors ta' sena part-time (MQF 5) hu organizzat mid-Dipartiment tal-Malti bis-sehem tal-Kunsill Nazzjonali tal-Ilsien Malti. L-applikazzjonijiet għall-kors li jmiss miftuħin u tista' tapplika sa tmiem Jannar 2025 mis-sit tal-Università. Il-lezzjonijiet isiru online u l-eżamijiet isiru fil-klassi. Kompli aqra dwaru minn hawn.  

Ritratt meħud minn Stephen Buhagiar. Agħfas fuqu biex tara l-ktejjeb tal-kors.

Il-manuskritt mitluf tad-dizzjunarju Malti-Ingliż u Ingliż-Malti ta' Salvatore Mamo (1838-1918), li kien mingħalina nqered fit-Tieni Gwerra Dinjija, instab minn Dr Steve Borg ta' Malta Libraries. Issa li ġie diġitalizzat għall-preservazzjoni, se jiġi traskritt u ppubblikat b'kollaborazzjoni bejn Malta Libraries u l-Università ta' Malta. Il-manuskritt ta' aktar minn 1,800 paġna nstab f'kollezzjoni privata ma' ittra li tikkonferma li hu xogħol Mamo. X'aktarx inħadem bejn l-1885 u l-1918, u huwa verżjoni mkabbra tad-dizzjunarju żgħir ta' Mamo tal-1885.

Il-proġett, immexxi mis-Sur Dwayne Ellul u Dr Olvin Vella mid-Dipartiment tal-Malti, għandu l-għan li jagħmel dan ix-xogħol disponibbli għar-riċerkaturi u l-pubbliku.  

Ritratt ta' James Moffett. Agħfas fuqu biex taqra l-artiklu li deher fi Newspoint.

Fl-okkażjoni taċ-ċentinarju mill-pubblikazzjoni tat-Tagħrif fuq il-Kitba Maltija (1924), l-Akkademja tal-Malti tellgħet konferenza biex tiċċelebra dan il-manwal importanti li fuqu hi msejsa l-ortografija tal-Malti. Matulha ġew diskussi aspetti differenti marbuta ma' din il-pubblikazzjoni bis-sehem ta' għadd ta' kelliema, fosthom il-Prof. George Farrugia, il-Prof. Manwel Mifsud, u Dr Olvin Vella. Minbarra li taw ħarsa lejn l-avvenimenti storiċi li wasslu għall-istandardizzazzjoni tal-kitba bil-Malti, iddiskutew il-prinċipji ewlenin li fuqhom inbnew ir-regoli tal-kitba minn Ninu Cremona u Ġanni Vassallo u l-aġġornamenti li saru fihom matul is-snin.

Ritratt ta' Mark Micallef Perconte. Agħfas fuqu biex tara l-filmat tal-konferenza.

Jekk ma tixtieqx tisma' aktar b'aħbarna, waqqaf is-sħubija