Fit-18 ta' Jannar uħud mill-istudenti li qed jagħmlu Masters jew Dottorat iltaqgħu ċ-Ċentru Animazzjoni u Komunikazzjoni (ĊAK) għal seminar informattiv li kien maqsum f'żewġ partijiet. Fl-ewwel parti Kirsty Azzopardi, membru tad-Dipartiment, iddiskutiet kif l-Intelliġenza Artifiċjali tista' tgħinna fir-riċerka. Fit-tieni parti l-ġurnalist Mark Laurence Zammit tkellem fuq modi differenti kif tippreżenta l-qofol ta' studju lill-pubbliku.

Dan is-seminar ittella' bħala parti mis-sensiela Appuntamenti mar-Riċerka li tlaqqa' lill-istudenti postgradwatorji ma' aspetti differenti tar-riċerka akkademika u tagħtihom l-opportunità jiddiskutu xogħolhom ma' xulxin, mal-letturi, u ma' nies minn oqsma differenti. 

Id-Dipartiment tal-Malti qed jissieħeb mal-kumpaniji li joffru s-servizzi tagħhom fl-ajruport biex iwassal kliem u espressjonijiet bażiċi bil-Malti lill-impjegati tagħhom. Dan qed jagħmlu b'rabta mal-ktejjeb Il-Vjaġġ it-Tajjeb li ppubblika ftit tax-xhur ilu. B'hekk l-impjegati barranin tal-ajruport ikunu jistgħu jikkomunikaw aħjar mal-passiġġieri Maltin. 

Dawn is-sessjonijiet wiċċ imb wiċċ qed imexxuhom is-Sa Kirsty Azzopardi, is-Sur Thomas Pace u l-Prof. Michael Spagnol, li qed jiltaqgħu regolarment magħhom fi gruppi żgħar. Fihom il-parteċipanti jingħataw kopja tal-ktejjeb u jkollhom iċ-ċans jipprattikaw il-Malti bl-għajnuna tar-riżorsi li ttellgħu fit-taqsima Learn Maltese tas-sit malti.mt.

Kont taf li l-kelma "pinzell" tintuża, fost l-oħrajn, fil-qasam tax-xagħar, tal-mastrudaxxa, tal-iskapran, u anke taż-żwiemel? Dan huwa wieħed mit-termini li ssib fil-glossarji marbuta ma' snajja' u oqsma differenti, fosthom il-mużika, il-bizzilla u l-mediċina.

Agħfas fuq il-kelmiet u skopri għal xiex jirreferu fil-kuntesti differenti. Tista' tfittex bl-alfabett jew bil-qasam. S'issa lħaqna l-4,000 terminu. Ħafna minn dawn inġabru mit-teżijiet li mexxa d-Dipartiment u minn studji li jagħmel.

Jekk ma tixtieqx tisma' aktar b'aħbarna, waqqaf is-sħubija