Fil-15 ta' Ottubru se ssir konferenza interdixxiplinarja fuq ir-rumanz Il-Familja de Valereux jew Louis Mitluf Ġewwa l-Bosk ta' Concetta Brincat. Dan huwa l-ewwel rumanz oriġinali bil-Malti li nafu bih miktub minn mara (1919). Ix-xogħol se jiġi ppubblikat għall-ewwel darba u ppreżentat fil-konferenza.   

Il-programm iħares lejn ir-rumanz minn tliet perspettivi ewlenin:

(A) It-test u l-ġeneru letterarju: Il-Prof. Adrian Grima, l-editur tar-rumanz, jitkellem fuq il-provi testwali li jissuġġerixxu li dan ix-xogħol mhuwiex traduzzjoni jew adattament; Dr Marilyn Mallia taqra r-rumanz fid-dawl tal-konvenzjonijiet tar-rumanz popolari fl-Ewropa ta' żmienha; Francesca Xuereb titkellem fuq l-iżvilupp tal-karattri femminili; u Maria Simiana tispjega l-proċess tat-traskrizzjoni tar-rumanz mill-pitazzi oriġinali tal-awtriċi.

(B) Il-kuntest storiku u soċjali: Dr Simone Azzopardi tqiegħed ir-rakkont fil-kuntest tar-Rivoluzzjoni Franċiża u l-ħajja f'Malta fil-bidu tas-seklu 20; Dr Noel Buttigieg jifli l-kultura tal-ikel u x-xorb; u Fr Ray Gatt OP jiddiskuti l-elementi reliġjużi.

(Ċ) Id-deskrizzjoni tal-ilbies u l-moda: Caroline Tonna tesplora s-sinifikat tad-deskrizzjonijiet tal-ilbies tan-nobbli; u Annamaria Gatt, minn Heritage Malta, turi xi lbies li jissemma fir-rumanz u li jinsab fil-kollezzjoni nazzjonali.

Il-konferenza tibda fil-5:30 PM u se ssir fis-Sala Pietru Pawl Saydon (ALT), l-Università ta' Malta, Tal-Qroqq.
Agħfas fuq ir-ritratt għal tagħrif ieħor.

Id-disa' konferenza tal-Għaqda Internazzjonali tal-Lingwistika Maltija (GĦILM) saret fis-16 u s-17 ta' Settembru 2025 il-Ġermanja, u kellha t-tema "Rooting for Maltese." Il-konferenza laqqgħet aktar minn 30 riċerkatur u riċerkatriċi minn diversi pajjiżi fosthom Malta, il-Ġermanja, Franza, is-Slovakkja, l-Istati Uniti, u ċ-Ċina.

Il-programm inkluda 21 preżentazzjoni u fetaħ b'taħdita mill-kelliema mistiedna Dr Jessica Nieder dwar "The State of Maltese Linguistic Research." Il-preżentazzjonijiet koprew diversi oqsma tar-riċerka lingwistika bħall-morfoloġija, il-fonetika u l-fonoloġija, is-sintassi, u s-soċjolingwistika. 

Il-konferenza kienet ikkordinata minn Ruben van de Vijver mill-Heinrich-Heine-Universität Düsseldorf b'kollaborazzjoni mal-Malta Centre, irrappreżentat minn Raffaello Bezzina, Michela Vella, u Maike Vorholt. L-għaxar konferenza se ssir Malta fl-2027. 

Agħfas fuq ir-ritratt għal tagħrif ieħor. 

Dwayne Ellul u Joseph Buttigieg attendew kors ta' taħriġ intensiv dwar il-lessikografija u l-lingwistika tal-korpora f'Bari, l-Italja. Wieħed mill-kelliema ewlenin matul il-kors kien il-lingwista u l-lessikografu Michael Rundell li, fost l-oħrajn, tkellem fuq il-qagħda lessikografika attwali u l-vantaġġi ta' dizzjunarji online. Julie Moore, li ħadmet fuq bosta dizzjunarji ewlenin, mexxiet sessjoni dwar ix-xogħol lessikografiku fil-prattika. Il-kors kien jinkludi taħriġ fuq il-pjattforma Sketch Engine u fuq is-software tal-kumpilazzjoni tad-dizzjunarji, Lexonomy. 

It-temi li ġew indirizzati huma fundamentali għar-riżorsi meħtieġa għall-ilsien Malti, bħalma huma l-bini ta' korpora ġodda u l-kumpilazzjoni ta' dizzjunarji. Is-Sur Dwayne Ellul huwa lettur fid-Dipartiment tal-Malti u jispeċjalizza fil-lessikografija waqt li s-Sur Joseph Buttigieg jgħallem il-lingwistika tal-korpora. 

Agħfas fuq ir-ritratt għal tagħrif ieħor.

Jekk ma tixtieqx tisma' aktar b'aħbarna, waqqaf is-sħubija