Din is-sena l-Konferenza Dun Karm se tieħu l-forma ta' tliet diskorsi qosra dwar il-poeta nazzjonali minn perspettivi differenti. 

Il-Prof. Dominic Fenech se jitkellem fuq il-perjodu bejn iż-żewġ gwerer dinjija bħala żmien ta' tibdil u qawmien politiku u kulturali li jixħet dawl fuq il-poeżija ta' Dun Karm. Dr Simone Azzopardi se tesplora kif il-poeta jirrappreżenta lill-mara u l-ideal femminili fid-dawl tal-kuntest kolonjali u soċjali ta' żmienu filwaqt li l-Prof. Immanuel Mifsud se janalizza kif il-poeżija ta' Dun Karm, speċjalment dik politika, toħloq diskors ta' distinzjoni bejn "jien" u "l-ieħor."

Il-konferenza se ssir l-Erbgħa li ġej, 5 ta' Novembru 2025, fis-Sala Erin Serracino Inglott (LT1), l-Università ta' Malta. Tibda fis-6:30 PM u wara jkun hemm riċeviment żgħir.

Hawn tista' tara ritratti mill-aħħar konferenza dwar l-ewwel rumanziera, Concetta Brincat, imtellgħa mid-Dipartiment tal-Malti fil-15 ta' Ottubru 2025.

Id-Dipartiment tal-Malti qed jikkollabora mad-Dipartiment tax-Xjenza Miftuħa tal-Librerija tal-Università ta' Malta biex jittellgħu gazzetti, perjodiċi, u ħarġiet oħra antiki bil-Malti fl-OAR@UM. B'dan il-proġett ir-riċerkaturi u dawk kollha interessati jistgħu jaqraw dawn il-ħarġiet mill-kumdità ta' darhom, u l-kopji stampati tal-gazzetti u r-rivisti ma jkomplux jitgħarrqu bl-użu. 

S'issa ttellgħu l-ħarġiet kollha tal-gazzetta In-Naħla (1908-1912, 1928) ta' Agostino Levanzin; tal-gazzetta Il-Ħabib (1912-1928) ta' Ġużè Muscat Azzopardi; u tar-rivista letterarja Il-Polz – Organu tal-Moviment Qawmien Letterarju (1967-1974, 1977-1984). 

Il-format diġitali ta' dawn il-ħarġiet, maqluba bl-OCR, hu ta' għajnuna kbira għar-riċerkaturi biex ifittxu vokabolarju speċifiku u temi speċjalizzati.   

Agħfas fuq l-istampa għal tagħrif ieħor fuq il-kontenut tal-gazzetti u l-perjodiċi. 

Il-Ħadd 19 ta' Ottubru r-Rappreżentanza tal-Kummissjoni Ewropea f'Malta u l-Università ta' Malta tellgħu t-tielet edizzjoni ta' Festalingwi, avveniment li jiċċelebra l-Jum Ewropew tal-Lingwi f'pajjiżna bis-sehem ta' ħafna dipartimenti u istituzzjonijiet. 

Id-Dipartiment tal-Malti ħa sehem b'żewġ attivitajiet differenti: lezzjonijiet interattivi tal-Malti u t-tieni edizzjoni ta' Kwiżżikk. Fil-lezzjonijiet Kirsty Azzopardi u Romario Sciberras iddiskutew mal-parteċipanti espressjonijiet marbutin mal-ħobż; taw ħarsa lejn ingredjenti u verbi marbuta mat-tisjir; u ppreparaw ftira mħawra la Maltija. Il-kwiżż dar ma' temi ispirati minn erba' kanzunetti Maltin: l-elementi naturali, id-dar, il-ġisem, u l-festi. Il-logħob varjat kien jinkludi anagrammi, tislibiet, u mistoqsijiet li talbu għarfien ta' lessiku u xogħlijiet letterarji lokali. Dawn l-attivitajiet ikkordinathom Anthea Enriquez bl-għajnuna ta' letturi u riċerkaturi tal-Malti. 

Agħfas fuq ir-ritratt biex tara oħrajn.

Jekk ma tixtieqx tisma' aktar b'aħbarna, waqqaf is-sħubija