Isma' b'Aħbarna | Jannar 2026

Jannar 2026

Araha online

Is-sit tar-riċerka tad-Dipartiment tal-Malti

Fetħu l-applikazzjonijiet għall-kors fil-qari tal-provi

Dan l-aħħar ikkwalifikaw 42 persuna oħra biċ-Ċertifikat Universitarju fil-Qari tal-Provi bil-Malti. Fost il-qarrejja tal-provi l-ġodda hemm edukaturi, xandara, uffiċjali tal-komunikazzjoni f'entitajiet tal-gvern, tradutturi mill-istituzzjonijiet Ewropej, uffiċjali tal-kunsilli lokali, u ħaddiema oħra mis-settur privat. Minn meta fetaħ fl-2006, dan il-kors b'kollox temmewh b'suċċess 772 ruħ.

Dan il-kors ta' sena part-time (MQF 5) hu organizzat mid-Dipartiment tal-Malti bis-sehem tal-Kunsill Nazzjonali tal-Ilsien Malti. L-applikazzjonijiet għall-kors li jmiss miftuħin u tista' tapplika sat-30 ta' Jannar fis-2 PM mis-sit tal-Università. Il-lezzjonijiet isiru online u l-eżamijiet isiru fil-klassi. Kompli aqra dwaru minn hawn.

Ritratt meħud minn Stephen Buhagiar. Agħfas fuqu biex tara l-ktejjeb tal-kors.

Akkademiku Affiljat mad-Dipartiment tal-Malti

Il-Prof. Adam Ussishkin hu akkademiku fid-Dipartiment tal-Lingwistika tal-Università ta' Arizona, l-Istati Uniti. Jispeċjalizza fl-oqsma tal-fonoloġija, il-morfoloġija u l-psikolingwistika, l-aktar tal-Malti u l-ilsna Semitiċi. Ilu ħafna snin jaħdem mill-qrib mad-Dipartiment tal-Malti u mal-Istitut tal-Lingwistika u t-Teknoloġija tal-Lingwa, speċjalment fuq riċerka dwar elementi tal-grammatika tal-Malti minn perspettiva psikolingwistika. Bħala akkademiku affiljat qed jikkollabora mad-Dipartiment fit-tagħlim, ir-riċerka, is-superviżjoni ta' proġetti u teżijiet, u f'inizjattivi oħra.

Seminar għall-istudenti postgradwatorji

Fl-10 ta' Jannar uħud mill-istudenti li qed jagħmlu Masters u Dottorat iltaqgħu ċ-Ċentru tal-Konferenzi Dar il-Ħanin Samaritan għal seminar mis-sensiela Appuntamenti mar-Riċerka. Fl-ewwel parti l-Prof. Joseph Brincat għamel taħdita fuq il-proġett internazzjonali OIM li qed jiddokumenta kliem ta' oriġini Taljana li daħal f'lingwi oħra. Il-Prof. Brincat, li qed jikkordina r-riċerka fuq il-Malti, tkellem fuq kif tuża d-database tal-OIM u xi diffikultajiet li qed jiltaqgħu magħhom. Fit-tieni parti Dr Luke Galea, miċ-Ċentru tal-Litteriżmu u l-Ħiliet Komunikattivi fl-Ingliż, tkellem fuq l-għodod u l-ħiliet meħtieġa għall-preżentazzjoni tar-riċerka lil udjenza akkademika.

Workshop dwar ir-riżorsi diġitali

It-tielet workshop dwar ir-riżorsi diġitali għall-Malti se jsir il-Ħamis 29 ta' Jannar. Qed intellgħuh b'kollaborazzjoni mal-Istitut tal-Lingwistika u t-Teknoloġija tal-Lingwa, id-Dipartiment tal-Intelliġenza Artifiċjali, il-Kunsill Nazzjonali tal-Ilsien Malti, u l-Malta Centre. Matulu se jiġi diskuss l-iżvilupp taċ-ċekkjatur u ta' riżorsi oħra għall-integrazzjoni tal-Malti fil-qasam diġitali u fl-intelliġenza artifiċjali.

Biex tattendi fiżikament, l-Università l-Qadima, jew online, biż-Zoom, irreġistra minn hawn.

Agħfas fuq l-istampa għal tagħrif ieħor.

Id-Dipartiment tal-Malti, Il-Fakultà tal-Arti, L-Università ta’ Malta, L-Imsida MSD 2080, Malta

Ibdel is-sħubija | Araha online

Jekk ma tixtieqx tisma' aktar b'aħbarna, waqqaf is-sħubija