Fit-13 ta' Frar sar is-Seminar tat-Teżini li hu appuntament annwali tad-Dipartiment tal-Malti bis-sehem tal-letturi u l-istudenti tal-Baċellerat. F'dan is-seminar, ikkoordinat mill-Prof. Immanuel Mifsud, Karl Sciberras irċieva l-Premju Ġużè Aquilina għat-teżina tal-BA "Analiżi kwantitattiva u soċjolingwistika ta' ħames gruppi ta' varjanti fonetiċi-ortografiċi" u Bradley Cachia ngħata l-Premju Oliver Friggieri għat-teżina tiegħu "It-Teatralità fil-Proża Skont l-Addattament Tagħha għat-Teatru: Il-Każ ta' Fil-Parlament ma Jikbrux Fjuri." Dawn iż-żewġ gradwati u tnejn oħra, Thea Pace u Kurt Theuma, għamlu preżentazzjoni dwar it-teżini tagħhom li ntlaqgħu tajjeb ħafna mill-bord tal-eżaminaturi.

Waqt is-seminar tqassmu s-sitt ħarġa ta' Riċerkaturi u l-ewwel ħarġa ta' Qabelxejn, ir-rivisti akkademiċi tad-Dipartiment tal-Malti.

Agħfas fuq ir-ritratt biex tara oħrajn. 

Fil-21 ta' Frar niċċelebraw il-Jum Dinji tal-Lingwa Materna. L-Università fakkritu b'filmat qasir li fih Dr Olvin Vella tkellem dwar uħud mid-dokumenti qodma bil-Malti li nsibu fl-Arkivju tal-Librerija tal-Università. Isemmi l-manuskritti tal-poeżiji "Jum ir-Rebħ" ta' Rużar Briffa u "Il-Jien u lil Hinn Minnu" ta' Dun Karm. Jirreferi għall-gazzetta In-Naħla, maħruġa minn Agostino Levanzin, li darba kiteb dwar it-Tabib Giovan Francesco Buonamico u l-poeżija tiegħu "Mejju Ġie bil-Ward u Żahar." Isemmi wkoll prietki qodma ddatati li jagħtuna idea ta' kif inbidel ilsienna mis-seklu 18 sal-lum.   

Id-Dipartiment tal-Malti, l-Akkademja tal-Malti u l-Għaqda tal-Malti – Università qed jorganizzaw konferenza dwar l-awtriċi Mary Meylak u x-xogħlijiet tagħha. 

Se ssir is-Sibt 7 ta' Marzu, fid-9:00 AM, l-Aula Prima, l-Università l-Qadima. Il-kelliema huma Beverly Agius, Olivia Borg, Anthea Enriquez, Maria Frendo, Immanuel Mifsud, u Nathan Anthony Pace. Wara l-preżentazzjonijiet tal-kelliema, tliet poeżiji ta' Meylak li ġew immużikati minn Tano Monsigneur se jiġu interpretati mill-kor Vox Dulcis, immexxi minn John Anthony Fsadni.

Din il-konferenza miftuħa għall-akkademiċi, l-istudenti, u l-pubbliku ġenerali. Id-dħul bla ħlas. Irreġistra minn hawn. 

Agħfas fuq il-poster għal tagħrif ieħor aġġornat.

Jekk ma tixtieqx tisma' aktar b'aħbarna, waqqaf is-sħubija