Id-Dipartiment tal-Malti jifraħ lil David Agius Muscat li kiseb id-Dottorat u lil Daniel Bezzina u lil Jean Paul Borg li ggradwaw b'Masters fil-Malti. David kiteb teżi fuq "Id-definizzjoni tal-Malti standard fl-ewwel nofs tas-seklu 19"; Daniel ħadem fuq "Il-mixja tal-kliem fid-dizzjunarji Maltin: analiżi ta' lemmi marbutin mal-kuluri"; u Jean Paul stħarreġ il-figura tal-missier fil-letteratura Maltija: "Minn xiħ għal pops: ir-rappreżentazzjoni tal-missier mid-disgħinijiet 'l hawn."

Waqt iċ-ċerimonja tal-gradwazzjoni, il-Prof. George Farrugia, għamel diskors fuq il-qawwa tal-lingwa f'isem l-akkademiċi.

Is-Sibt 14 ta' Marzu wħud mill-istudenti li qed jagħmlu Masters jew Dottorat mad-Dipartiment iltaqgħu Villa Psaigon, Ħad-Dingli, għat-tielet irtir li organizzajna bħala parti mill-programm tal-Appuntamenti mar-Riċerka. Is-sessjoni prattika mexxieha Dr Luke Galea u fiha ffukajna fuq kif nisiltu tagħrif relevanti mill-kitba u nippreżentawh b'mod effettiv f'punti qosra.

L-irtir ikkordinawh is-Sa Kirsty Azzopardi u s-Sa Justine Somerville.    

Fis-6 ta' Marzu ltqajna ma' xi studenti tal-Malti fl-Iskola Postsekondarja Mikelanġ Refalo t'Għawdex. Is-Sa Kirsty Azzopardi kellmet lill-istudenti dwar l-impenn tad-Dipartiment għat-tagħlim u r-riċerka, il-korsijiet, u l-firxa ta' karrieri li jaqbdu dawk li jistudjaw il-Malti. Luke Refalo, f'isem l-Għaqda tal-Malti – Università, laqqa' lill-istudenti mal-ħidma tal-Għaqda – minn attivitajiet għall-istudenti u l-pubbliku sa pubblikazzjonijiet bħal Leħen il-Malti. Magħna kien hemm ukoll Haley Xuereb, waħda mill-fundaturi tal-ġurnal letterarju Mgħawġin li qed tistudja l-Liġi u li tkellmet dwar l-importanza tal-Malti f'dan il-qasam. L-istudenti li kienu preżenti ngħataw xi kopji ta' Riċerkaturi u kopja tal-aħħar ħarġa ta' Leħen il-Malti. 

Jekk ma tixtieqx tisma' aktar b'aħbarna, waqqaf is-sħubija