Isma' b'Aħbarna | April 2026

April 2026

Araha online

Is-sit tar-riċerka tad-Dipartiment tal-Malti

Żewġ studenti tal-Malti fil-Lista tad-Dekan

Id-Dipartiment tal-Malti jifraħ lil żewġ studenti tat-tielet sena tal-Baċellerat, David Attard (Malti u Ingliż) u Nathan Anthony Pace (Malti u Lingwistika), li daħlu fil-Lista tad-Dekan.

Dan ir-rikonoxximent jingħata lill-istudenti li jiksbu l-aħjar riżultati fl-ewwel sentejn tal-kors tagħhom. Din is-sena ngħata b'kollox lil tmintax-il student/a minn dipartimenti differenti tal-Fakultà tal-Arti. Għaċ-ċerimonja kienu preżenti d-Dekan, il-Prof. Dominic Fenech, u l-Kap tad-Dipartiment, il-Prof. Adrian Grima.

Ritratt ta' James Moffett mill-Uffiċċju tal-Komunikazzjoni tal-UM. Agħfas fuqu biex tara oħrajn.

Il-Malti fis-SEA-EU

Fi Frar u April id-Dipartiment tal-Malti ħa sehem f'żewġ avvenimenti internazzjonali organizzati mis-SEA-EU, l-alleanza ta' universitajiet li jmissu mal-baħar.

Is-Sa Kirsty Azzopardi u s-Sa Justine Somerville mexxew sessjoni interattiva (Maltese Language Crash Course) li fiha taw ħarsa ġenerali lejn il-Malti billi qasmu mal-parteċipanti ftit fatti lingwistiċi u kulturali u daru l-alfabett u xi vokabolarju. Is-Sur Dwayne Ellul mexxa Language Café li matulu l-parteċipanti kellhom l-opportunità jintroduċu ruħhom lil xulxin bil-Malti u jitħaddtu dwar l-ikel u l-platti favoriti tagħhom. Barra minn hekk, il-Prof. Joseph M. Brincat ta taħdita fuq il-lingwa Maltija f'pajjiż multilingwi.

Agħfas fuq ir-ritratt għal tagħrif ieħor.

Taħdita dwar il-Kantilena

F'għeluq sena mill-inklużjoni tal-Kantilena fir-Reġistru tal-Memorja tad-Dinja tal-UNESCO, Dr Olvin Vella għamel taħdita bl-isem "Ejja Nagħmlu Festa bil-Kantilena." It-taħdita saret bi sħab mal-Fondazzjoni tal-Arkivji Nutarili (NAF) fl-Arkivju tar-Reġistri Nutarili, fi Triq San Pawl, il-Belt.

Dr Vella mexa pass pass mal-versi tal-Kantilena u indirizza għadd ta' aspetti marbuta mal-kuntest storiku u lingwistiku, bħall-ħajja politika fil-Medjuevu, il-bidliet fit-tifsira tal-kliem tagħha, u d-differenzi fil-ħoss tal-lingwa meta mqabbla ma' tal-lum. Enfasizza li, mindu nstabet fl-1966, ħadu interess fiha numru ta' akkademiċi u riċerkaturi, u għad hemm lok għal aktar studju.

Ritratt ta' Massimo Denaro mill-Fondazzjoni tal-Arkivji Nutarili. Dr Joan Abela, il-President tan-NAF, qed tagħti kwadru b'kopja tal-Kantilena fuq karta fotografika lil Dr Olvin Vella. Agħfas fuq ir-ritratt biex tara oħrajn.

Ċertifikati lill-ħaddiema barranin tal-Maypole

Madwar sittin ħaddiem/a fil-ħwienet tal-Maypole temmew kors fil-Malti bażiku. Huma ngħataw ċertifikat waqt ċerimonja li saret fil-15 t'April, l-Università l-Qadima, il-Belt.

Il-kors, imħejji mid-Dipartiment tal-Malti, sar matul is-sajf u ħarreġ lill-parteċipanti fil-vokabolarju u l-frażijiet bażiċi li jeħtieġu fuq il-post tax-xogħol biex jikkomunikaw b'mod aktar effettiv mal-klijenti Maltin.

Agħfas fuq ir-ritratt biex taqra d-diskors tas-Sur Dwayne Ellul li kkordina dan il-kors.

Id-Dipartiment tal-Malti, Il-Fakultà tal-Arti, L-Università ta’ Malta, L-Imsida MSD 2080, Malta

Ibdel is-sħubija | Araha online

Jekk ma tixtieqx tisma' aktar b'aħbarna, waqqaf is-sħubija