Fid-29 ta’ April iċċelebrajna l-ħidma akkademika tal-Prof. Manwel Mifsud li rtira wara karriera ta’ madwar 40 sena fid-Dipartiment tal-Malti. Uħud mill-kollegi tiegħu tkellmu dwar kif jafuh u fuq il-ħidma tagħhom miegħu. L-interventi ffukaw fuq it-tagħlim tal-Malti mad-Dipartiment; il-programm Seħer il-Malti li jippreżenta fuq Radju Malta; il-ħidma tiegħu mal-Prof. Ġużè Aquilina fuq id-dizzjunarju; ir-riċerka lingwistika li wettaq; is-sehem ewlieni li kellu fit-twaqqif tal-Kunsill Nazzjonali tal-Ilsien Malti u t-tfassil tal-Kors fil-Qari tal-Provi; u l-kontribut tiegħu bħala kantawtur. Minbarra l-viżjoni u l-ħidma sfiqa tal-Prof. Mifsud, matul is-serata spikkaw l-umiltà, il-ġenerożità, u l-ambizzjoni li hu magħruf għalihom.

Ritratt ta' Elisa von Brockdorff. Agħfas fuqu biex tara servizz mill-aħbarijiet tal-PBS fuq il-Prof. Manwel Mifsud.

Fl-okkażjoni tat-tieni sena tal-proġett Bejn Kliem u Atti tellajna serata bis-sehem ta’ Sarah Schembri u Kelsey Ciantar, studenti tal-Baċellerat, li qraw l-istejjer li kitbu ispirati minn dokumenti fl-Arkivju tar-Reġistri Nutarili. Dr Joan Abela introduċiet iż-żewġ stejjer billi tkellmet fuq l-isfond storiku u d-dokumentazzjoni marbuta magħhom. Wara kull qari l-Prof. Immanuel Mifsud qasam mal-udjenza ftit riflessjonijiet dwar xi karatteristiċi narrattivi li spikkaw.

Dan il-proġett joffri lill-istudenti esperjenza interdixxiplinarja li tinseġ id-dokumentazzjoni storika mal-kitba kreattiva u jagħti ħajja ġdida lil stejjer minsija. Huwa kkordinat mis-Sa Justine Somerville f’isem id-Dipartiment tal-Malti, u minn Dr Joan Abela, is-Sa Vanessa Buhagiar u s-Sur James Farrugia mill-Fondazzjoni tal-Arkivji Nutarili.

Ritratti ta’ James Farrugia. Agħfas fuqhom biex tara oħrajn u taqra tagħrif ieħor fuq is-serata.     

Fl-aħħar ġimgħa ta’ April ilqajna lill-Prof. Livio Gaeta mill-Università ta’ Turin. Il-Prof. Gaeta huwa lingwista Taljan u professur rinomat li jispeċjalizza fil-lingwa u l-lingwistika Ġermaniża.

Matul iż-żjara tiegħu ta żewġ taħditiet. Fl-ewwel waħda, “Nouns of Instance: An Intriguing Mediterranean Isogloss,” iddiskuta fid-dettall l-imġiba tas-suffiss misluf mit-Taljan -ata li nsibu fi kliem bħal passiġata u bluhata. Fit-tieni taħdita, “Morphological productivity and the rise of snowclones,” tkellem fuq il-produttività; id-definizzjonijiet tagħha, il-modi differenti kif titkejjel u l-kriterji li jistgħu jintużaw biex niddistingwuha mill-kreattività. Fid-dawl ta’ dan, iddiskuta wkoll elementi bħal mini- u super- fit-Taljan, żewġ prefissi li nsibuhom anke fil-Malti. Il-Prof. Gaeta kellu wkoll xi laqgħat ma’ wieħed mid-dottorandi tad-Dipartiment li qed jirriċerka l-formazzjoni tal-kelma u s-suffissi derivattivi fil-Malti.

Jekk ma tixtieqx tisma' aktar b'aħbarna, waqqaf is-sħubija