Fid-19 ta’ Ġunju nedejna proġett ambizzjuż għall-ilsien Malti: Dizzjunarju.mt, id-dizzjunarju nazzjonali tal-Malti fuq l-internet. Il-Malti se jkollu dizzjunarju diġitali, miftuħ u bla ħlas, maħsub għal min jikteb, jaqra, jittraduċi, jgħallem jew jitgħallem il-Malti.

Bis-saħħa ta' esperti mill-oqsma tal-lessikografija, il-lingwistika, il-lingwistika tal-korpus, u t-teknoloġija tal-informatika, qed jinbena dizzjunarju li jagħti d-definizzjoni bil-Malti, l-ekwivalenti bl-Ingliż, tagħrif grammatikali u gwida għat-tlissin, eżempji bbażati fuq l-użu naturali tal-lingwa, l-idjomi u l-frażijiet, u n-nisel tal-kliem.

L-edituri ġenerali huma l-Prof. Michael Spagnol u s-Sur Dwayne Ellul. Dan il-proġett qed isir mid-Dipartiment tal-Malti bl-għajnuna ta' Sketch Engine, Lexical Computing, Dictionary Express, RIDT, Times of Malta, u Malta Daily.

Agħfas fuq ir-ritratt biex tara oħrajn.

Il-ħames konferenza annwali mis-sensiela Appuntamenti mar-Riċerka saret is-Sibt 6 ta' Ġunju, l-Università l-Qadima. Sitt riċerkaturi tal-Masters u d-Dottorat ippreżentaw l-istudju tagħhom fuq il-lingwa u l-letteratura Maltija.

Fl-ewwel parti Justine Somerville għamlet l-intervent bl-isem "Il-Kriżi tal-Memorja fir-Rumanz Modern"; Joseph Buttigieg tkellem dwar l-iżvilupp ta' korpus tal-Malti fil-preżentazzjoni "Ritratt tal-2022"; u Jean Paul Borg għamel l-intervent "Bejn Xiħ u Pops: Fejn Jinsab il-Missier?" fuq it-teżi tal-Masters dwar ir-rappreżentazzjoni tal-missier fil-letteratura Maltija kontemporanja. Fit-tieni parti tal-konferenza Raffaello Bezzina tkellem dwar "L-Affissi Derivattivi fil-Malti: Xi osservazzjonijiet u diffikultajiet"; Yanika Schembri Fava ddiskutiet "Il-Kodiċi tal-Memorja fil-Vers Popolari Malti"; u Michela Vella, li kisbet id-Dottorat mill-Istitut tal-Lingwistika u t-Teknoloġija tal-Lingwa, għamlet il-preżentazzjoni "Lil hinn mill-ewwel kliem: L-iżvilupp tal-lingwa fit-tfal Maltin."

Fil-konferenza ġiet ippreżentata ħarġa oħra tar-rivista Qabelxejn - Riċerka Postgradwatorja fil-Malti, ippubblikata mid-Dipartiment tal-Malti mal-Malta University Press. Din it-tieni ħarġa tinkludi studji ta' Raffaello Bezzina, John Paul Grima, Lara Stagno, u l-Prof. Immanuel Mifsud.

Agħfas fuq ir-ritratti biex tara oħrajn.     

Matul is-sajf tista' ssegwi l-kors Il-Malti Pass Pass: L-Ortografija biex issir midħla tar-regoli u l-prinċipji bażiċi tal-kitba bil-Malti.

Il-kors huwa mmexxi mis-Sur Keith Attard u jista' japplika għalih kulħadd. Jikkonsisti fi 28 siegħa lezzjonijiet u b'eżami fl-aħħar. Is-sessjonijiet se jsiru kollha online nhar ta' Erbgħa mit-3pm sal-5pm, u jibdew fit-8 ta' Lulju 2026. Dawk li jtemmu l-kors b'suċċess jingħataw ċertifikat uffiċjali bħala rikonoxximent tal-ħiliet miksuba fl-ortografija.

L-applikazzjonijiet jagħlqu fit-3 ta' Lulju. Agħfas fuq il-poster għal iktar tagħrif.

Jekk ma tixtieqx tisma' aktar b'aħbarna, waqqaf is-sħubija