L-Għaqda tal-Malti – Università twaqqfet minn Rużar Briffa u Ġużè Bonnici, żewġ studenti tal-Mediċina, fl-1931. Illum hija waħda mill-iżjed għaqdiet attivi fost l-istudenti tal-Università. L-attivitajiet li torganizza b'mod regolari matul is-sena jiġbdu ħafna nies b'interessi differenti. Dan huwa kollu mertu tal-kumitat żagħżugħ u ħabrieki li joħlom b'ideat friski u jistinka biex iwettaqhom. Dan ix-xahar saret il-Laqgħa Ġenerali Annwali u ngħatat ħarsa lejn il-ħidma ta' matul it-terminu li għadda. Inħatar ukoll il-kumitat il-ġdid għat-terminu 2023-2024. Id-Dipartiment tal-Malti jawgura lill-GħMU aktar enerġija u ħidma b'risq ilsienna.    

Agħfas fuq ir-ritratt tal-kumitat il-ġdid tal-Għaqda biex tara ritratti oħra li ttieħdu waqt il-LĠA.

L-avukat Għawdxi u l-President Emeritu Anton Buttigieg twieled fi Frar 1912 u miet f'Mejju 1983. Minkejja li għaddew erbgħin sena minn mewtu jibqa' jissemma għall-poeżiji tiegħu, b'mod speċjali dawk marbutin man-natura. F'intervista li għamillu l-Professur Aquilina fl-1961, Buttigieg jaqra u jiddiskuti ż-żewġ poeżiji magħrufa tiegħu 'Il-Kebbies tal-Fanali' u 'Niftakar', u jitkellem fuq l-effetti tal-ħajja pubblika fuq kitbietu.  

Agħfas fuq l-istampa biex tisma' l-intervista.

'Mejju Ġie bil-Ward u Żahar' ta' Giovan Francesco Buonamico nkitbet għall-ħabta tal-1670 u hija t-tieni l-eqdem poeżija bil-Malti. Minkejja li kiteb għadd ta' poeżiji bil-Latin, bit-Taljan u bil-Franċiż, jidher li din il-poeżija li tfaħħar lill-Gran Mastru Cotoner hija l-unika waħda li kiteb bi lsienna. Il-poeżija oriġinali għosfrot mill-manuskritt li kienet fih, imma saru żewġ kopji tagħha: waħda minn Agius De Soldanis u oħra minn Agostino Levanzin. F'intervista li kienet saret minn Nikol Baldacchino, Dr Olvin Vella jaqra din il-poeżija u jsemmi li filwaqt li kemm De Soldanis kif ukoll Levanzin jgħidu li mxew fedelment mal-oriġinal, bejn l-erba' kwartini taż-żewġ verżjonijiet hemm 66 differenza. 

Agħfas fuq l-istampa biex tisma' l-intervista li kienet saret fuq Radju RTK.