Vol 1. Malta: Natural History Society, Vol 2. Malta: Society for the Study and Conservation of Nature, Vol 3/4/5. Malta: Nature Trust - Malta

Kif miktub fl-ewwel volum, l-ewwel ħarġa tal-1979, paġna 29, din ir-rivista kienet irriklamata bl-isem The Maltese Naturalist - New Series. Biss, l-isem kellu jinbidel u sar li hu sabiex ikun konformi mal-Att 22 (1978) tal-Liġi Maltija li tipprojbixxi l-użu tal-kliem ‘Maltaʼ, ‘Nationalʼ u derivattivi oħra minnhom fʼtitli taʼ kotba, gazzetti, ismijiet taʼ ditti, u l-bqija, mingħajr il-permess tal-Prim Ministru. Hija rivista bʼħafna informazzjoni bl-Ingliż u figuri taʼ natura bijoloġika. Wieħed jistaʼ jsibu kollu fis-sit elettroniku tal-Università taʼ Malta.

Valletta: Soċjetà Ornitoloġika

Mill-1982 sal-1985 din ir-rivista kien jisimha L-Għasfur u l-Ambjent Naturali biex fl-1986 biddlet isimha għal In-Natura u baqgħet tiġi ppubblikata sal-2003. Fʼdin ir-rivista wieħed isib informazzjoni terminoloġika utli ħafna, kif ukoll diversi figuri sbieħ bʼmod frekwenti u li jkomplu jsebbħu lil din ir-rivista.

Malta: Is-Soċjetà Ornitoloġika (1970-1991), BirdLife Malta (1992-2020)

Rivista ornitoloġika taʼ BirdLife Malta (qabel l-1992, is-Soċjetà Ornitoloġika) u ssevi bħala mezz għall-pubblikazzjoni taʼ artikli u noti qosra li jittrattaw kull aspett tal-ornitoloġija li bʼxi mod jaffettwa lill-Gżejjer Maltin u l-Mediterran. Hija miktuba bl-Ingliż. Fiha wkoll listi sistematiċi taʼ għasafar reġistrati fil-gżejjer tagħna, rapporti taʼ raritajiet, kif ukoll rapporti tal-irringjar tal-għasafar. Mil-lat terminoloġiku, il-listi bʼtermini bil-Malti li fiha huma bʼsaħħithom ħafna. Fil-perjodu bejn l-1974 u l-1980, ir-rivista baqgħet tippreżenta l-istess listi u aspetti ornitoloġiċi tas-soltu - anzi, żiedet xi artikli informattivi dwar il-qasam - però eliminat il-verżjoni Maltija tat-termini tal-ispeċi trattati u baqgħet biss bʼdik Latina u Ingliża. Ukoll, din l-affari hija evidenti fil-verżjonijiet l-aktar riċenti tar-rivista.

Malta: Dipartiment tas-sajd

Fil-Melitensia tal-Università taʼ Malta jeżistu minn Frar tal-1954 sa Mejju 1966 u hemm taʼ diversi xhur niqsin. Dan huwa folju taʼ natura informattiva dwar is-sajd li kien joħroġ darba fix-xahar. Kull fuljett kien ikun magħmul minn 4 paġni, għad li hemm uħud li jgħaqqdu xahrejn sħaħ u għalhekk jikkonsistu minn iżjed paġni. Dal-folju jinkludi ħafna informazzjoni ġenerali xahar bʼxahar, maħruġa mid-Dipartiment tas-sajd, li tinterssa lis-sajjieda u kull min hu midħla taʼ das-settur. Jinkludi wkoll ħafna tagħrif taʼ natura kwantitattiva, ngħidu aħna, dwar qbid taʼ ħut matul ix-xahar, ħut impurtat, ħut li nħatt minn skejjen barranin, prezzijiet bl-imnut, informazzjoni relatata maʼ applikazzjonijijet għall-kannizzati, rimjiet, liċenzji, reġistrazzjonijiet, regolamenti, u l-bqija. Fl-aħħar paġna taʼ kull fuljett (aktarx, paġna 4), hemm taqsima relatata mat-tip taʼ ħut li jkun inqabad matul dak ix-xahar partikolari. Fʼdan is-sens, din it-taqsima hija wkoll taʼ interess terminoloġiku, iżda mʼiniex nikludiha hawnhekk peress li li hija konsistenti. Il-ħarġiet 108, 109 u 110 ħariġhom għalihom Joe Barbara fil-ktejjeb Ismijiet tal-Ħut tal-Mediterran (1961). Wara li waqfet tinkiteb din ir-rivista fl-1968 bdiet toħroġ rivista oħra bl-isem Agrikoltura u Sajd, bʼxeħta aktar ġenerali, li fil-Melitensia tal-Università taʼ Malta ma sibthiex.

Malta: Soċjetà Mużikali La Stella Levantina A.D. 1894 - ĦʼAttard

Rivista aċċessata mill-Kollezzjoni Programmi tal-Festa li qed tinġabar bʼħafna mħabba u dedikazzjoni mil-librara tal-Kulleġġ Ġan Franġisk Abela (Junior College), l-Imsida.

Malta: Is-Soċjetà Entomoloġika taʼ Malta

Rivista, mifruxa fʼsebaʼ volumi, mimlija studji riċerkati bl-Ingliż dwar l-insetti tal-Gżejjer Maltin.

Malta: L-Għaqda tal-Kittieba tal-Malti / L-Akkademja tal-Malti

Malta: Id-Dipartiment tal-Malti, Fakultà tal-Arti, fl-Università taʼ Malta / Midsea Books

Rivista akkademika tad-Dipartiment tal-Malti li bdiet fl-1961 mill-Prof. Ġużè Aquilina. L-għan tagħha hu li tistimula r-riċerka interdixxiplinarja fl-oqsma tal-Lingwistika u tal-Letteratura Maltija. Il-biċċa l-kbira tal-ħarġiet fihom kitbiet fuq l-istudju tal-lingwa u tal-kritika u t-teorija letterarja, imma xi ħarġiet jinkludu monografiji. Peress li hi maħsuba għall-komunità akkademika internazzjonali u spiss ikun fiha studji ta’ riċerkaturi barranin, ir-rivista toħroġ bl-Ingliż. Dan l-aħħar, ir-rivista qed tinħadem bil-kollaborazzjoni taʼ Midsea Books u qed tiffoka fuq qasam wieħed taʼ interess, ngħidu aħna, fuq De Soldanis (2010), il-Kantilena (2014) u Buonamico (2017).

Malta: Tipgografia del Corriere

Gazzetta dwar il-mediċina u l-ixjenza naturali. Il-maġġorparti tagħha hija bit-Taljan, biss, hemm partijiet minnha miktubin bl-Ingliż. Qed niddokumenta biss dawk il-partijiet fejn hemm xi termini bil-Malti li fil-maġġoranza jinsabu fil-korsiv ġewwa t-test.

Malta: L-Għaqda Maltija tal-Istorja Naturali

Rivista li kienet toħroġ darba fis-sena, miktuba bl-Ingliż minn awturi varji. Tinvolvi informazzjoni dettaljata dwar oqsma differenti tal-istorja naturali fʼMalta bʼillustrazzjonijiet impinġijin. Ħafna mit-terminoloġija li tissemma fiha hija bl-Ingliż jew bil-Latin, però, id-dokumentazzjoni li ġbart fʼdil-filliera hija relatata biss mad-drabi fejn jissemmew xi termini bil-Malti. Fil-librerija tal-Melitensia tal-Università taʼ Malta hemm il-ġabra kollha nnumerata. Il-paġni li qed nagħti hawn hija minn din il-ġabra, skont is-sena u x-xahar li qed nindika.

Malta: Għaqda Maltija tal-Folklor

Malta: De La Salle Brothers Publications

Malta: Nature Trust Malta

Rivista qasira bʼartikli bl-Ingliż (il-maġġoranza tagħha) u bil-Malti dwar aspetti u aħbarijiet li jikkonċernaw aspetti naturali varji tal-gżejjer Maltin, imżejna bi ftit stampi u illustrazzjonijiet, bʼxi paġni minnha inklinati għall-qarrejja żgħar. Fil-bidu tagħha kienet intenzjonata li tkun ippubblikata erbaʼ darbiet fis-sena. Aktarx bdiet toħroġ qabel is-sena 2000. Fil-Melitensia tal-Univessità taʼ Malta jeżistu mis-6 ħarġa (2000) sal-34 ħarġa (2011) biss, fatt li lanqas jinnega li jeżistu iżjed ħarġiet riċenti taʼ Il-Kampanja. L-edituri sal-2004 (ħarġa 21) huma mniżżlin fil-qoxra tal-ħarġiet stess imma dawk li ħejjew il-ħarġiet li ġew wara (mill-2005, ħarġa 22 ʼil quddiem) mhumiex rikonoxxuti.

Malta: Is-Soċjetà Ornitoloġika (1977-1994), BirdLife Malta (1999-)

Inizjalment (fl-1977), din ir-rivista nħolqot apposta sabiex tikkumplimenta r-rivista Il-Merill, li maż-żmien ħadet xejra iżjed xjentifika. Fil-fatt, din tʼhawn saret bl-iskop li tiġbor l-aħbarijiet tas-Soċjetà Ornitoloġika taʼ Malta (wara, BirdLife Malta) u artikli taʼ interess ġenerali, fost l-oħrajn. Hija rivista miktuba bl-Ingliż.

Malta: L-Uffiċċju tal-Biedja

Rivista informattiva bil-Malti, miġbura fi tliet volumi, li bdiet toħroġ darba fix-xahar mill-editur il-Professur John Borg (li dak iż-żmien kien is-Suprintendent tal-Biedja), u tittratta l-biedja Maltija. Kienet toħroġ mill-Uffiċċju tal-Biedja. Il-ħlas biex tabbona għaliha kien taʼ 2|-fis-sena u xi drabi kienet tingħata bʼxejn lill-bdiewa li kien jistħoqqilhom. Kienet tiġi stampata fl-Istamperija tal-Gvern. Sa mill-bidu tagħha, ir-rivista bdiet taċċetta avviżi u reklami kummerċjali li għandhom xʼjaqsmu mal-biedja. Ladarba, kienet l-unika rivista li fi żmienha kienet tittratta dan il-qasam, u għalhekk kienet tinqara minn bosta bdiewa taʼ Malta u Għawdex, l-importaturi taż-żerriegħa tal-patata, tal-ġwież, tal-għodod tal-biedja u tal-inbid, tad-demel artifiċjali, tar-razez tat-tjur u taʼ annimali oħra, sabu fiha pjattaforma tajba ħafna biex sabiha jilħqu lill-ħafna bdiewa tal-gżejjer. L-ewwel ħarġa tagħha kienet fʼDiċembru tal-1932 u l-aħħar waħda tagħha kienet tkopri x-xhur taʼ April sa Settembru tal-1935. Minn ħarġa għall-oħra, il-paġni tagħha jkomplu bʼmod kontinwu, sakemm jingħaqad volum.